وحدك الباقي بأرضك
يا الحامل هم الوطن
وحدا البارودة ل معك
ما بتنحني
ولا بتنكسر
مهما الزمن جار ودار
وكل ما بيسقط بطل
بيرفع بطل راية الوطن
تيظل فوق العز
مجدك يا وطن
يا بيرق ما بينكسر
شامخ بوج الريح والتكفير
يا الواقف والوجع صوتك
يا الناطر والحزن صمتك
رغم الحقد و نفير الموت
بتبقى عالي
وجبينك كبير
يا لسارق من الوقت أحلامنا
ومكتوبة بالسما أحبارنا
عيس ب قانا صلى وسجد
يا رب عينك عا أرز الرب
بارك فينا كل بنت ولد
والعذرا بكل بيت بتتمجد
صبح ومسا بتكحل بالحب أمانينا
صلي معي يا لحبك سر الدني
وحدك بتقتل الخوف وملوك الظلم
وحدك بتسهر والعمر ليل وبكي
يا لحامل سيف المحبة
وسلاحك بحر عشتار
ودم الأرض نبضك وتاجك
وأبطالك مزروعة عاحد السيف
وكل فرس بتختار خيالها
ولو خيروني بكنوز الجان
أنا ما بيع من ها الصف دمعة
ولا بخونك
ولا بغير بريدي
طالما باقي بها الوطن طلقة
وإن سألوني مينك إنت
بكتب عوج الشمس
بحروف من صوان
انك حقيقة من لبنان
ما بتموت ولو هرب الزمان
وجبالك ما بتنحني الا لباريها
يا مروج خضرا ملونة بالدم
من أيام عيسى و مهدك يا دني
مجبولة شهامة وحلم
متل الطير ل ما بيموت
يا دموع الحبق والفل
مسافرة عا وطن موجوع
مخبي عنك سؤال
بس موجود
بلفتات أمي الحنونة
بضحكة صبية خجولة
بتنهيدة حزن عن حلم عم ينذبح
ماخذ معه صور وحروف
كتبت على الحيطان سرك يا دني
بس رح بيعود ولو طول المشوار
مش كذبة انك يا وطن انسان
ومعك خدني وين ما بتروح الروح
المهم تركني بقلبك
حروف مسافرة
كلمات انكتبت
عا خيوط الشمس إنك إلي
وانك وطن ما بتموت
لو خلصت الدني
وكيف بدها تموت أرض
من أنفاسها خلق جبران
وحفرت عوج الغيم
أسرارها وأمانيها
ولو صرخة الموت
غيبت صوتي ورجوعي
وصيتي الك وعهودي
يا رفيقة الدرب الحنونة
بعلم لبنان ابقي يا أمي
لفيني وكفنيني
No comments:
Post a Comment